ភ្នំពេញ៖ អាជ្ញាធរខេត្តបាត់ដំបងបានណែនាំឲ្យពលរដ្ឋបង្កើនការប្រុងប្រយ័ត្ន ជាពិសេសមនុស្សចាស់ជរា ជនមានពិការភាព និងកុមារតូចៗ ខណៈកម្ពស់ទឹកនៅដងស្ទឹងសង្កែបន្តហក់ឡើងដល់ ១៤,៦០ម៉ែត្រ បើគិតត្រឹមព្រឹកនេះទឹកស្ទឹងសង្កែបានច្រាលលិចផ្លូវក្នុងក្រុងបាត់ដំបងហើយ។
លោក សុខ លូ អភិបាលខេត្តបាត់ដំបងបានសរសេរក្នុងផេករបស់ខ្លួននៅព្រឹកនេះថា បើមិនមានភ្លៀងធ្លាក់ច្រើននៅផ្នែកខាងលើបន្តទៀតទេ ជំនន់ទឹកក្នុងក្រុងនឹងឆាប់ស្រកទៅវិញ។
បើតាមលោក សុខ លូ ផ្លូវមួយចំនួនក្នុងខេត្តបាត់ដំបងរងការខូចខាតដោយសាររងគ្រោះទឹកជំនន់កន្លងមកនេះ។ ក្រោយទឹកស្រកទៅវិញ អាជ្ញាធរខេត្តក៏បានបិទស៊ីម៉ងត៍ជាបណ្តោះអាសន្នត្រង់ផ្លូវសំបុកមាន់។ បន្ទាប់ពីអាកាសធាតុអំណោយផលវិញ អាជ្ញាធរខេត្តនឹងបន្តជួសជុលទៅតាមទំហំថវិកាដែលខេត្តមាន។
លោក ផេង សិទ្ធី អភិបាលក្រុងបាត់ដំបងដែលបានដឹកនាំក្រុមការងាររដ្ឋក្រុងនិងរដ្ឋបាលសង្កាត់អូរម៉ាល់ បានចុះពិនិត្យទឹកលិចស្រែ ដោយជំនន់ទឹកភ្លៀងនៃផ្នែកខាងលើ នាថ្ងៃទី០៣ ខែតុលា បានបញ្ជាក់ថា ក្រុមការងារកំពុងរកវិធីទម្លាក់ទឹកទៅតាមប្រឡាយផ្នែកខ្លះនៃស្រុកថ្មគោល ដើម្បីបញ្ជៀសការជន់លិច។
បើតាមអភិបាលក្រុងបាត់ដំបង ស្ថានភាពទឹកជំនន់បានធ្វើឲ្យប៉ះពាល់ដល់ស្រែចម្ការរបស់ពលរដ្ឋចំនួនជាង ២ពាន់ហិកតា៕
